PMA KUMBINSIDONG GUILTY SI GMA

Ni Rey Marfil

--------------------------------------------------------------------------------

Tulad ng mga nakararaming mamamayang Filipino, kumbinsido rin umano ang mga miyembro ng Philippine Military Academy (PMA) na ‘guilty’ si Pangulong Gloria Macapagal-Arroyo sa lahat ng ibinibintang dito partikular na ang pandaraya noong nakaraang eleksyon gaya ng nilalaman ng Hello Garci tape.

Sa kanyang paglutang kahapon sa Senado, ibinisto ni Gen. Francisco Gudani, assistant superintendent ng PMA, sa harap ng mga senador na totoo ang nilalaman ng Hello Garci tape at nagkaroon ng special operation ang Malacañang kung saan nagpadeliber pa si First Gentleman Mike Arroyo ng kalahating bilyong piso upang tiyaking mananalo ang kanyang esposa.

Nang tanungin ni Sen. Juan Ponce Enrile kung ano ang saloobin ng mga kadete ng PMA sa Garci scandal, sinabi ni Gudani na dismayado ang mga kadete kay Pangulong Arroyo.

"Iyong mga cadets believe that the President is guilty" pagkumpirma ni Gudani nang tanungin ni Sen. Enrile kung ano ang saloobin ng mga kadete sa Hello Garci tape, maging ang pagkakabasura sa impeachment complaint.

Bagama’t tanging senior class ang nakakapagbasa ng diyaryo at nakakapanood ng telebisyon sa PMA, nalalaman ng mga kadete, ayon kay Gudani kung anong nangyayari sa gobyerno at naniniwala ang mga itong totoong nandaya ang Pangulo noong nakaraang eleksyon.

Sa kasagsagan ng public hearing, inulan umano ng mga text messages si Gudani mula sa hanay ng mga junior officers ng Armed Forces of the Philippines (AFP) at mga kaklase sa PMA na pawang nagpapahayag ng suporta sa ginagawa nitong matapang na pagbubulgar ng katotohanan.

Kinumpirma ni Sen. Panfilo Lacson na kamuntikan pang maiyak si Gudani sa text messages na natanggap kung saan sinaluduhan at pinapurihan ang paglantad sa publiko.

Bago humarap sa Senado, nakaranas ng matinding pressure si Gudani para pigilan ang kanyang pagdalo sa Senado mula sa pinakamataas na opisyal ng Malacañang, AFP at maging sa pamunuan ng PMA na kinabibilangan nito.

"I’m saddened to inform you that there were high government official who tried to intervene through the chain of command in order to prevent me from appearing in this committee," pagbubunyag ni Gudani.

Kinumpirmang lahat ni Col. Alexander Balutan, dating Ground Commander ng Lanao Task Force at kasalukuyang assistant commandant ng PMA, ang testimonya ni Gudani, partikular ang nilalaman ng "Hello Garci tape".

Ilan sa nakakatulig na bombang pinasabog ni Gudani ang naging papel ni First Gentleman Arroyo sa dayaan noong eleksyon. Nagpadala umano ng 2 helicopter ng salapi sa Iligan City si G. Arroyo bago ang 2004 national election.

Isa umanong impormante ni Gudani ang nakasaksi sa delivery ng P500 milyon kung saan tig-P250 milyon ang idineliber ng 2 helicopter subalit tumanggi ang heneral na tukuyin kung sino ang kanyang impormante sa halip, handa umano itong humarap sa imbestigasyon sa takdang panahon.

Habang nagsasalita sa Senado sina Gudani at Balutan, agad na nagpulong ang AFP top brass at nagkasundong alisin sa puwesto ang mga nabanggit na opisyal at isailalim sa court martial proceedings.

Kinumpirma ni AFP chief of staff General Generoso Senga na ini-relieve mula sa kasalukuyang puwesto sina Gudani at Balutan, kapwa miyembro ng Philippine Marines.

Sinabi ni Senga na isasailalim sa court martial ang dalawang opisyal dahil sa diumano’y pagsuway sa kanilang superior officer bunga ng pagpunta sa Senado nang walang permiso mula sa Chief of Staff at sa Commander in Chief.

Tinuligsa naman ng mga kongresista ang hakbang na ito.

"That (action of the AFP), will create more division and sympathy in the Armed Force of the Philippines," pahayag ni Paras.

"Unti-unti nang nadudurog ang pader ni GMA dahil sa lakas ng ebidensya," ani Parañaque Rep. Roilo Golez bilang reaksyon sa rebelasyon ni Gudani.

Sinabi naman ni Negros Oriental Rep. Jacinto Paras, na hindi na kayang hadlangan ni Arroyo ang paglabas ng mga mabibigat na ebidensya dahil tiyak na lalabas na ang mga sundalong naghihintay lamang ng tamang panahon na kumampi sa katotohanan.