GARCI PINATAKAS NG GOBYERNO

Nina BERNARD TAGUINOD at REY MARFIL

--------------------------------------------------------------------------------

Naniniwala si Parañaque Rep. Roilo Golez na tinulungan ng gobyerno si dating Commission on Elections (Comelec) Commissioner Virgilio Garcillano sa pagtakas nito palabas ng bansa upang maiwasang ikanta ang nalalaman nito na tiyak umanong magdudulot ng matinding epekto sa presidency ni Pangulong Gloria Macapagal-Arroyo.

Sinabi rin ni Golez na "guilty" si Garcillano kaya tinakasan nito ang responsibilidad na sabihin sa bayan ang katotohanang naganap noong nakaraang eleksyon.

Bilang dating National Security Adviser, kumbinsido si Golez na may kinalaman ang gobyerno sa pagtakas ni Garcillano dahil wala itong kapasidad na tumakas mag-isa.

"The government is apparently scared to let him (Garcillano) face a congressional inquiry because he might spill the beans and fatally wound the President. If the President and Garci had nothing to hide, it would be so easy for the government to produce him. Guilty talaga si Garci," ani Golez.

Kaugnay nito, isang impormante ng TONITE sa Senado ang nagsabing nagkaroon ng sabwatan sa pagtakas ni Garcillano mula opisina ng Department of Transportation and Communication (DOTC), Department of Public Works and Highways (DPWH) hanggang Department of Justice (DOJ).

Ipinahayag pa ng impormante na ang may-ari ng Subic Air, eroplanong sinakyan ni Garcillano patungong Singapore noong Hulyo 14, ay malapit na kaibigan ni Mrs. Arroyo.

Kapatid umano ng may-ari ng Subic Air ang kongresista ng Palawan at kaalyado ng administrasyon na si Rep. Antonio Alvarez, miyembro ng Kabalikat ng Malayang Pilipino (KAMPI) na partido ni Pangulong Arroyo.

Samantala, naniniwala naman si Sen. Panfilo Lacson na konektado sa "Mike tape" ang kumpirmasyong inilabas ng Department of Foreign Affairs (DFA) sa kinaroroonan ni dating Commission on Elections (Comelec) Commissioner Virgilio Garcilano para pagtakpan ang kapalpakan ng Malacañang.

Sinabi ni Lacson na bago inilabas ng opisina ni DFA Secretary Alberto Romulo ang impormasyon tungkol kay Garcillano, unang minatyagan ang magiging epekto ng press conference ni Department of Environment and Natural Resource (DENR) Secretary Mike Defensor.

Dahil pumalpak ang "Mike tape" matapos pumalpak ang `tape expert’ ni Defensor na si Jonathan Tiongco, naghanap umano ng ibang isyung maaaring ipantakip ang palasyo kaya’t pinalutang ng DFA ang impormasyon sa pagtakas ni Garcillano.

"Babalikan natin ang chain of events. Bago nag-confirm ang DFA, inabangan muna na ilabas ni Mike Defensor ang kanyang authentication (sa Garci tape). At kung sakaling maganda ang (naging) resulta ng press conference ni Defensor siguro hindi na lang nila ikikibo si Garci," ani Lacson.

Nalalaman ng opisina ni Romulo, ayon kay Lacson, kung saan matatagpuan si Garcillano at kung kailan ito umalis ng Pilipinas subalit itinago ng mahabang panahon at hinintay ang magiging resulta ng press conference ni Defensor.