MILYONES SA GARCI ESCAPE

Nina BERNARD TAGUINOD at REY MARFIL

--------------------------------------------------------------------------------

Hindi barya kundi milyun-milyong piso ang umano’y isinuka ng gobyerno mapatakas lamang si dating Commission on Elections (Comelec) Commissioner Virgilio Garcillano.

Ito ang pagtatayang ginawa ni Parañaque Rep. Roilo Golez kahapon dahil hindi biro ang magpatakas ng isang high-profile individual tulad ni Garcillano kung walang milyones at walang pagsasabwatan.

"Ang ganyang operasyon ay super hush-hush. Milyones ang kailangan at powerful intermediaries ang kailangan," pahayag ni Golez na dating National Security Council (NSC) Adviser.

Dahil imposibleng walang alam ang Malacañang sa operasyong ito, aniya, malamang na sila rin ang gumastos sa tinaguriang "Great Garci Escape" at kung saan nagmula ang pera ay dapat umanong alamin ng taumbayan.

Ipinaliwanag ni Golez na organisado ang pagpapatakas kay Garcillano dahil nakaalis ito ng bansa nang may exit pass ang kanyang pasaporte dahil kung walang tatak ito ay hindi siya makakapasok sa Singapore.

Hindi rin, aniya, biro ang ginastos kung isinakay si Garcillano sa isang pribadong jet kaya nakarating ito sa Singapore.

Gayunpaman, hindi na nagtaka si Golez na gastusan ng gobyerno si Garcillano dahil kung hindi ito gagawin ay kakanta ito at tiyak na babagsak si Pangulong Gloria Macapagal-Arroyo.

Garci pinagtatakpan ng DFA

Kasabay ang alegasyong ‘high conspiracy’ ang pagtakas ni Garcillano, niresbakan ni Senate minority leader Aquilino Pimentel Jr. ang tanggapan ni Department of Foreign Affairs (DFA) Secretary Alberto Romulo at sinabing nagpapagamit ito para pagtakpan si Pangulong Arroyo.

Hindi nagustuhan ni Pimentel ang naging katugunan ng kanang-kamay ni Romulo na si DFA Spokesman Gilberto Asuque na hindi makakansela ang pasaporte ni Garcillano dahil wala itong pending criminal case.

"The DFA offered an alibi not legal reasons to cancel Garcillano’s passport," buwelta ni Pimentel.

Aniya pa, malinaw ang paglabag sa batas ni Garcillano subalit patuloy na nagmamatigas ang opisina ni Romulo na huwag kanselahin ang pasaporte ng dating Comelec official kahit kinumpirma ng pamahalaang Singapore ang pagdating sa kanilang bansa.

Kung makakansela ang pasaporte ni Garcillano, madali itong maibabalik ng Pilipinas dahil awtomatikong ipapatapon ng alinmang bansang puntahan nito, ayon kay Pimentel, at magkakaroon ng linaw ang Hello Garci scandal.

"The cancellation of the passport was intended to make Garcillano a person without travel papers and technically a stateless person, that would make it easy for authorities in his country of destination to track down and effect his apprehension and deportation to the Philippines," ani Pimentel.

Great conspiracy kakalkalin

Samantala, dahil nakaalis ng bansa si Garcillano nang hindi natutunugan ng mga awtoridad, nagpasya kahapon ang House committee on information at apat pang komite na nag-imbestiga sa "Hello Garci" scandal na muling magsagawa ng imbestigasyon.

Ayon kay Cavite Rep. Gilbert Remulla, chairman ng nasabing komite, pinadalhan na nila ng imbitasyon ang pamunuan ng Bureau of Immigration and Deportation (BID), Air Transportation Office (ATO), Aviation and Security Commission (AVESCOM), Subic Air at NAIA.

Sinabi ni Remulla na maraming dapat ipaliwanag ang mga nabanggit na tanggapan dahil lumalabas na nagkaroon ng matinding pagpapabaya sa kanilang tungkulin nang makatakas si Garcillano na hindi nila nalalaman.