Dinky: Mismong si GMA ang lumuluto!

(MA/EP/RM)

Mismong si Pangulong Gloria Macapagal-Arroyo ang nagmamaniobra sa moro-morong impeachment proceedings at ‘pakawala’ nito ang complaint na inihain ni Marcos loyalist Atty. Oliver Lozano.

Ito ang bombang pinasabog kahapon ni dating Sec. Corazon ‘Dinky’ Soliman ng Department of Social Welfare and Development (DSWD) sa press conference na ipinatawag ng ‘Hyatt 10’, grupo ng mga nagbitiw na miyembro ng gabinete ni Arroyo.

Sinabi ni Soliman na kaharap siya mismo nang mag-usap sina Arroyo at presidential adviser on political affairs Gabriel Claudio tungkol sa impeachment complaint na isinampa ni Lozano noong umaga ng araw na iyon (Hulyo 27).

Naganap umano ang pag-uusap na ito matapos ang "I am sorry" statement na binitiwan ng Pangulo sa publiko kaugnay ng ‘Hello, Garci’ controversy.

"I believe it is important that I make a statement. I was privy to a conversation. We were outside the Palace already that time at the second floor of the premier guesthouse when the two conversed about the complaint (Lozano’s) and Mrs. Arroyo asked Gabby (Claudio) if it is already endorsed. Then I heard Mrs. Arroyo saying to Gabby, ‘pa-endorse mo na’," salaysay ni Soliman.

"The President is intelligent, yes. And she can be very intelligent in doing evil things," anang dating kalihim na nagsabing mahirap para sa kanya na aminin ito dahil kahit paano at kahit sandali ay naging kabahagi siya ng balak na ito na ‘lokohin’ ang taumbayan sa ‘nilulutong’ impeachment proceedings.

"I believe the Lozano complaint is a friendly complaint precisely to bar any other complaint," dagdag pa ni Soliman.

Ang Lozano complaint ay inendorso ni Alagad partylist Rep. Rodante Marcoleta. Ngunit mariin naming itinanggi ng kongresista ang insinuwasyon ni Soliman na tinapik siya ng palasyo para isulong ang Lozano complaint.

"Hindi ako kasabwat ng Malacañang at hindi ko nakausap si Claudio at maging ang Pangulo," diin ni Marcoleta.

Ikinayanig naman ng palasyo ang pagbubunyag ni Soliman subalit gaya ni Marcoleta, naging maagap sa pagtanggi si Claudio.

"Ako, I’m looking forward to an occasion na magkatapat kami (Soliman) at magkatinginan sa mata at ulitin n’ya ‘yung akusasyon na ‘yan at uulitin ko naman na kasinungalingan ang sinasabi n’ya," diin ni Claudio.