Vote buying talamak sa impeachment

(RMarfil/BTaguinod)

--------------------------------------------------------------------------------

Matinding bentahan ng boto sa "kill impeachment" ang inilunsad ng kampo ni Pangulong Gloria Macapagal-Arroyo.

Ito ang ipinahayag kahapon ni Senate minority floor leader Aquilino "Nene" Pimentel Jr. kasunod ang pagbanggit sa naganap na pagbaliktad ni AVE Partylist Rep. Eulogio Magsaysay at pagbawi ng lagda sa impeachment complaint.

Hindi maiwasang pagdudahan ni Pimentel ang pagbaliktad ni Magsaysay dahil ito pa umano ang unang nagbulgar sa ginagawang panunuhol sa kanya ng Malacañang, kabilang ang P500 libong cash, P5 milyong pork barrel at karagdagang upuan sa party-list organization na kinakatawan, kapalit ng pagbasura sa impeachment complaint.

Sa hindi inaasahang pangyayari, mismong si Magsaysay pa, ayon kay Pimentel, ang kauna-unahang bumaliktad at bumawi ng kanyang pirma gayong makailang-beses pa itong nagpa-presscon upang ibisto ang panunuhol ng Malacañang.

"There is neither rhyme nor reason behind Magsaysay’s turnaround, especially considering that he was the one who blew the whistle," ani Pimentel.

Kahit sariling kamag-anak -- si Sen. Ramon Magsaysay Jr., inamin ang natikmang pressure ng kanyang pinsan sa kamay ng Malacañang, kaakibat ang alegasyong naipit ang kongresista kaya’t binawi ang pirma.

Sa kabilang banda, ayaw paniwalaan ni Sen. Magsaysay ang senaryong ‘nagkabilihan’ kaya binawi ng kanyang pinsan ang pirma bagama’t inamin nitong nalagay sa balag ng alanganin ang kanilang angkan dahil sa pangyayaring ito.

Samantala, hanggang kahapon ay nakapako pa rin sa 46 ang lumantad na endorsers sa impeachment subalit ayon kay Parañaque Rep. Roilo Golez, may isang bloke ng kongresista na lalagda na sa susunod na linggo.

"Masaya ang grupo (pro-impeachment). We expect blocks of congressmen joining us soon," pahayag ni Golez.

Kinumpirma ito ni House minority leader Francis "Chiz" Escudero na nagpakita ng kakaibang sigla kahapon sampu ng mga kasamahan sa minorya.

"Madadagdagan na kami," masayang sabi ni Escudero.