IMPEACH GLORIA 8 PIRMA NA LANG!

Ni BERNARD TAGUINOD

--------------------------------------------------------------------------------

Walong boto na lamang ang kailangan ng Impeachment Team sa Mababang Kapulungan ng Kongreso para malitis na si Pangulong Gloria Macapagal-Arroyo sa Senado.

Ito ang napag-alaman sa isang impormante sa Kamara kaugnay ng bilang ng mga kongresistang nagsusulong sa impeachment case laban kay Arroyo.

Ayon sa impormasyong nakalap ng TONITE, bukod sa orihinal na 42 endorsers, mayroon pang 15 itinatagong boto ang Impeachment Team matapos madagdagan ng lima ang bilang ng mga kongresista mula sa administration bloc na unang ihinayag ni San Juan Rep. Ronaldo Zamora na nangakong pipirma.

Bukod dito ang pitong minority congressmen, ayon sa source, ang naghihintay na lamang na makabuo ng 72 lagda ang kanilang mga kasamahan bago sila lumagda.

Sa kasalukuyan, hindi pa lumalagda bilang endorser ng impeachment ang pitong mambabatas na ito na kinabibilangan nina Caloocan Reps. Luis Asistio at Oscar Malapitan, Laguna Rep. Benjamin Agarao, Partido ng Manggagawa party-list Rep. Renato Magtubo at 3 pa dahil sa paniniwalang "pekeng presidente" si Arroyo.

Nabatid pa na anumang araw mula ngayon ay lalagda na rin ang pito sa walong miyembro ng Nacionalista Party (NP) sa impeachment case kaya kung susumahin, ayon pa sa source, ay walong pirma na lamang ang kailangan upang magtuluy-tuloy na ang impeachment proceeding laban kay Arroyo.

Samantala, sa pulong ng House committee on justice na pinamumunuan ni Maguindanao Rep. Simeon Datumanong, napagkasunduan na sisimulan na ang imbestigasyon sa tatlong kaso laban kay Arroyo simula Agosto 10.

Ayon kay Datumanong, dalawang beses sa kada linggo magsasagawa ng imbestigasyon ang komite subalit aalamin muna kung mayroong form and substance ang isinampang kaso.

Kaugnay nito, tila naisahan naman ang oposisyon nang payagan ng mayorya na i-adopt ang rules of impeachment na ginamit noong panahon ni dating Pangulong Joseph Estrada dahil lalabas na hindi maipapasok ang amended complaint na pinagpagurang buuin ng grupo ni House minority leader Francis "Chiz" Escudero.

Ayon kina House majority leader Prospero Nograles at Ilocos Norte Rep. Salacnib Baterina, sa rules of impeachment na ginamit kay Estrada, hindi pinapayagan ang amended complaint kaya tanging ang unang kasong isinampa ni Atty. Oliver Lozano na walang kaakibat na ebidensya lamang ang didinggin.

Lumalabas na pangatlong reklamo lamang ang isinampang kaso nina Escudero at dahil hindi pinapayagan ang amended complaint, malamang na mabalewala lamang ito.

Gayunpaman, nagbabala ang oposisyon na kapag hindi pinayagan ng mayorya na ipasok ang amended complaint, mahaharap sa matinding problema si Pangulong Arroyo.

"Any attempt to subvert the rules of impeachment would provoke the wrath of the people and severe turbulence," babala ni Parañaque Rep. Roilo Golez.

Iba naman ang paniniwala ng grupo ni Escudero dahil tiwala ang mga itong maipasok ang kanilang amended complaint kahit anong gagawing pagharang ng mga alipores ni Arroyo.